Azərbaycanın premium səviyyəli kinoteatrı bu yaxınlarda keçirilmiş 67-ci Kann festivalının açılış filmini təqdim edir.

Kinoteatr may ayının 22-dən etibarən mövsümün ən gözlənilən filmlərindən olan “Monako Şahzadəsi” filminin nümayişlərinə başlayır.

Film Monako şahzadəsindən və onun seçimindən bəhs edir. Hollivud onun ayaqlarının altında ikən, möhtəşəm villalar, Oskar ziyafətləri və cazibəli kişilər olduğu halda onun seçimi Fransa yaxınlığında kiçik ölkənin şahzadəsi, şah sarayı və zadəgan balları olur. O, Hollivudun kraliçası olarkən, Monakonun Şahzadə xanımı olmağı üstün tutur.

Film dram və tərcümeyi-hal janrında çəkilib. Filmin rejissoru Olivye Daan, Monako şahzadəsi rolunu isə məşhur Hollivud ulduzu Nikol Kidman oynayıb.

Qeyd edək ki, kinoteatr may ayının 21-də filmin qapalı nümayişini təşkil etmişdi. Qala gecədə ölkənin bir çox məşhur simaları, mədəniyyət və incəsənət xadimləri, iri şirkətlərin rəhbərləri və ictimai xadimlər iştirak etmişdilər.