Mart ayının 2-də Azərbaycanın premium kinoteatrı “28 Cinema”da səbirsizliklə gözlənilən “Ay Brilliant” filminin təqdimatı olub. Təqdimat günündə həmçinin dəvət olunmuş media nümayəndələri üçün mətbuat konfransı keçirilib.

Filmin təqdimatından sonra “Ay Brilliant” filminin baş prodüsseri İlkin Həsəni, rejissoru Kənan M. M və aktyor heyəti media nümayəndələrinə film haqqında məlumat veriblər və suallarına cavab veriblər. Tədbirin sonunda isə pərəstişkarları ilə fotosessiyada iştirak ediblər.

“Ay Brilliant” filmi “İlk Media” və “Azad Azərbaycan” (ATV) televiziya kanalının birgə layihəsidir. Film “Bozbash Pictures”-ın yaradıcıları tərəfindən hazırlanıb və komediya janrında çəkilib. Filmdə İlkin Həsəni, Ramil Babayev, Elşən Orucov, Nicat Rəhimov, Azər Baxşaliyev, əməkdar artist Şamil Süleymanov, Pərvin Abıyeva kimi məhşur aktyorlar rol alıb.

Film mart ayının 2-dən etibarən ölkənin bütün kinoteatrlarında nümayiş olunmağa başlayır.

“Ay Brilliant” filmində hadisələr “Bozbash Pictures”dən tanıdığımız 5 əsas qəhrəmanın ətrafında cərəyan edir. Filmin qəhrəmanlarından olan Şirin təsadüfən, mafiyadan oğurlanmış medalyon əhvalatının qurbanına çevrilir. Nəticədə məsələni həll etmək istəyən Şirinin dostları -qohumları Şəmi, Şöşü, Fəlakət və Şirinin özü Hacı adlı mafiya başçısının əsiri olurlar. Bütün bu hadisələrin fonunda Topal adlı başqa mafiya başçısı da məsələyə qarışır.