“28 Cinema” kinoteatrında “Kapital Bank”ın sponsorluğu ilə “Mosfilm” həftəsinin açılışı oldu.

Fevralın 20-dən 25-dək “Mosfilm” kinostudiyasının məşhur filmləri nümayiş etdiriləcək. Film həftəsi “Mosfilm” kinostudiyanın yaradılmasının 90 illiyi münasibətilə keçirilir.

Mətbuat konfransında “Oskar” mükafatı laureatı, Rusiyanın Xalq Artisti, kinorejissor Vladimir Menşov, Rusiyanın Azərbaycandakı səfiri Vladimir Doroxin, “Kapital Bank”ın nümayəndəsi Kamran Kərimbəyov, “28 Cinema” kinoteatrının təmsilçisi Rüfət Abbasov və media nümayəndələri iştirak edirdilər.

Valdimir Menşov “Mosfilm” kinostudiyasını Bakıda təmsil etməkdən məmnunluğunu ifadə edib:

“Mən şadam ki, “Mosfilm” kinostudiyasının yaradılmasının 90 illiyi münasibətilə Bakıda keçirilən tədbirdə iştirak edirəm. Mənim uşaqlıq illərim Bakıda keçib. Hətta “Hökumət Evi”nin necə tikilməsinin şahidi olmuşam. Xalalarım burada yaşayır, bakılıdırlar. Bakı həmişə gözəl şəhər olub, hazırda da inkişafa doğru irəliləyir. Bakı mənə sanki Beyrutu xatırladır”.

Məşhur aktyor “Mosfilm” kinostudiyasının işindən də söhbət açıb:

“Rusiya kino sənayesinin aparıcı müəssisəsi olan “Mosfilm” kinostudiyasının istehsal gücü ildə yüz filmdən çoxdur. Rusiyanın bütün kino, tele və video məhsulları burada çəkilir”.

Qeyd edək ki, fevralın 21-də “Uğur centlemenləri”, 22-də “İvan Vasilyeviç peşəsini dəyişir”, 23-də “Qafqaz əsiri və ya Şurikin yeni macəraları”, 24-də “Moskva göz yaşlarına inanmır”, 25-də isə “İşdə məhəbbət macərası” və “Brilyant əl” filmləri nümayiş ediləcək.