“Amburan Mall”da “CinemaPlus” kinoteatrının açılışı baş tutub

03.08.2016

İyulun 31-də Bilgəh qəsəbəsindəki “Amburan Mall” ticarət mərkəzinin 1-ci mərtəbəsində yerləşən müasir premium kinoteatr “CinemaPlus Amburan”ın açılış mərasimi baş tutub.

Gecənin qonaqları şou-biznes ulduzları, məşhur jurnalistlər, bloqqerlər, sahibkarlar və iri şirkətlərin rəhbərləri olublar.

Açılış mərasimi açıq səma altında keçirilib.

“CinemaPlus” kinoteatrlar şəbəkəsinin baş direktoru Zaur Darabzadə və “Amburan Mall” ticarət mərkəzinin baş meneceri Rəcəb Babayev giriş sözü ilə qonaqları salamlayıblar. Tədbirdə həmçinin “CinemaPlus” kinoteatrlar şəbəkəsinin repertuar planlaşdırılması üzrə direktoru Faiq Kazımov da çıxış edib.

Mərasimdə diqqəti dekorasiya, güllərdən hazırlanan arka, şarlar və nəhəng dirijabl da çəkib. Tədbirin sonunda qonaqlara tort təqdim olunub və atəşfəşanlıq olub.

Əsas tərəfdaşlarından biri beynəlxalq keyfiyyətə nəzarət sahəsində lider sayılan “İntertek” şirkəti idi.

Dünyada 44 ölkədə 500-dən çox kinoteatrın dizayn işlərini reallaşdıran Kanadanın “Mesbur + Smith Architects” şirkəti isə “CinemaPlus Amburan” kinoteatrının da dizayn işlərini öz üzərinə götürüb.

Kinoteatrda dünya standartlarına cavab verən 3 zal var. Zallar İspaniya istehsalı olan yüksək səviyyəli rahat kreslolar ilə təchiz olunub. Bundan başqa “CinemaPlus Amburan”da “Master İmage 3D” texnologiyası tətbiq olunur.

VİP zalda tamaşaçıların filmi qida və içki sifariş etmək şəraiti yaradılmış şəxsi masası olan kreslolarda izləmək imkanları olacaq. İzləyicilər kino nümayişi zamanı mobil telefonları kreslolarda xüsusi quraşdırılmış USB avadanlığının vasitəsilə cərəyanla doldurmaq şansını da əldə edəcəklər.

Kinosevərlərə unudulmaz anlar və ideal istirahət bəxş etmək imkanı bununla məhdudlaşmır. Təbii ki, popkornsuz, sərinləşdirici içkilərsiz film izləmək və həzz almaq ağlasığmazdır. Burada xoş və komfortlu istirahət üçün müxtəlif popkornlar, şəkərli pambıqlar və buzlu alkoqolsuz kokteyllər təklif olunur.