Son illər Azərbaycanda iqtisadi inkişafın nəticəsi olaraq, ölkə əhalisinin istirahət etmək üçün seçim imkanları genişlənib.

Təkcə son 5 ildə ölkədə yüzlərlə istirahət məkanları yaradılıb, 10 il əvvəl barmaqla sayılan kinoteatrların, böyük əyləncə mərkəzlərinin sayında xeyli artım var.

Günün istənilən vaxtında həmin yerlərdə çoxlu sayda insanların olması onu söyləməyə əsas verir ki, bu gün azərbaycanlılar əldə etdikləri qazancın müəyyən hissəsini istirahətə yönəldirlər.

Qeyri-hökumət təşkilatlarından biri Bakı sakinlərinin bu gün istirahət üçün daha çox hansı məkana üz tutmasını araşdırmaq məqsədilə 1000 nəfər paytaxt sakini arasında maraqlı bir sorğu keçirib.

Rəyi soruşulanların 20,5%-i yaxud 205 nəfər istirahət üçün daha çox teatr və digər bu kimi mədəniyyət ocaqlarına üz tutduqlarını bildiriblər. Teatra üç tutan şəhər sakinlərin böyük əksəriyyəti isə Akademik Dövlət Dram Teatrı, Gənc Tamaşaçılar və Rus dram teatrına üz tuturlar – müvafiq olaraq, 48%, 32% və 20%.

Respondentlərin 18,9%-i yaxud rəyi soruşulan 189 nəfər isə istirahət obyekti kimi son illər paytaxtda sayları xeyli artan restoranlara üstünlük verir.

Bakı sakinləri arasında “necə istirahət etmək, əylənməyə üstünlük verirsiniz?” başlıqlı sorğuda ən böyük payı isə son illər sayları sürətlə artan kinoteatrlar tutub.

Belə ki, sorğuda iştirak edən 1000 nəfər paytaxt sakininin böyük əksəriyyəti – 60,6%-i yaxud 606 nəfəri əyləncə, istirahət məkanı kimi kinoteatrları seçib.

Əyləncənin bu növün üstünlük verən respondentlərin arasında isə paytaxtın üç əsas kinoteatrı – “28 Cinema”, “Park Cinema” və “Nizami” Kino Mərkəzi qərarlaşıb. Belə ki, kinoteatrlarda istirahəti seçən respondentlərin 77%-i “28 Cinema”, 19%-i “Park Cinema”, 5%-i isə “Nizami Kino Mərkəzinə” üz tuturlar.

Qeyd edək ki, sorğunun keçirilməsi zamanı adları çəkilən ictimai iaşə obyektlərinin təqdim etdikləri xidmətlərin keyfiyyəti, yerləşdiyi yerin nəqliyyat-kommunikasiya xətlərinə yaxınlığı və sair nəzərə alınıb.