“CinemaPlus” kinoteatrlar şəbəkəsində Hindistan, ABŞ və Fransa istehsalı olan “Bir gün kinoda” dramının nümayişi keçirilir.

Rejissor və ssenari müəllifi Pan Nalindir.

Film qismən əsas personaj kimi Qərbi Hindistanın Suaraştra bölgəsində, Qucarat əyalətində bir kənddə doğulub boya-başa çatan rejissorun tərcümeyi-halı üzərində çəkilib.

Filmin dünya premyerası 10 iyun 2021-ci ildə Tribeca Film Festivalında oldu. Film daha sonra Pekin Beynəlxalq Film Festivalında nümayiş etdirilib, burada Tiantan Mükafatına namizəd olub, həmçinin Valyadolid Beynəlxalq Film Festivalında Ən Yaxşı Film mükafatını qazanıb.

Baş rollarda Bhavin Rabari, Riça Mina, Rahul Koli və Tia Sebastian yer alıblar.

Film haqqında qısa məlumat: Filmdəki kimi yaşamaq milyonlarla insanın arzusudur. Kino sehri doqquz yaşlı gənc Samayın ürəyini fəth edəndə, xəyallarının real olması üçün yeri və göyü hərəkətə gətirməyə hazır olan oğlan, onu gözləyən ürəkağrıdan anlardan xəbərsizdir.

Qeyd etmək istərdik ki, “Bir gün kinoda” filminin Azərbaycanda nümayişi üçün eksklüziv hüquqlar yalnız “CinemaPlus” kinoteatrındadır.