Bakıda “CinemaPlus” premium kinoteatrlarında dublyaj redaksiyası “Cinemazadeh”, ABŞ Səfirliyi, Desperado musiqi məktəbi və “Azerbaijan Alumni Association”ın dəstəyi ilə 4-cü dəfə Azərbaycan Gənclər Film Festivalı keçiriləcək.

Оktyabrın 1-dən 3-dək Azərbaycan, ABŞ və Avropa filmləri nümayiş olunacaq, həmçinin, müxtəlif filmlərin eksklüziv təqdimatları, master-klass və başqa maraqlı mövzular olacaq.

Festivalın builki mövzusu “Öz hekayəni danış”dır. Festivalda qaçqınlara həsr olunan, qadınlar və Azərbaycandan olan cavan iştirakçılar tərəfindən çəkilən filmlər nümayiş olunacaq.

Festivalın ilk günü “CinemaPlus Gənclik Mall”da furşet və canlı musiqi ilə açılış mərasiminə və qaçqınlardan bəhs edən filmlərin nümayişinə həsr olunacaq.

Oktyabrın 2-də “CinemaPlus Azərbaycan”da iştirakçıların filmləri nümayiş olunacaq. Daha sonra isə təqdimatlar və master-klasslar keçiriləcək. Festivalın sonuncu günü təltifetmə olacaq. “Woman In Motion” layihəsi öz filmlərini nümayiş etdirəcək. Festivalın bütün günlərinə giriş pulsuzdur və ictimaiyyətə açıqdır.

Daha ətraflı: https://www.azerbaijanfilmfestival.com/