“Cinemaplus 28 Mall” kinoteatrında tamaşaçılarda böyük ajiotaj yaradan “Bayram axşamı” filminin imza günü keçirilib. Tədbirdə filmin yaradıcı heyəti iştirak edib, gələn qonaqlar ilə xeyli şəkil çəkdirib, avtoqraf paylayıblar.

“Bayram axşami” filminin prodüseri Əməkdar artist Murad Dadaşov hər kəsi salamlayaraq, filmin çəkiliş prosesində baş verən maraqlı hadisələrdən danışıb. Daha sonra yaradıcı heyət tamaşaçılar ilə birgə zala daxil olaraq filmi izləyiblər.

İmza gününün keçirildiyi növbəti məkan Gəncə şəhərində yerləşən “Cinemaplus Xəmsə” kinoteatrı olub. Gəncə sakinlərinin uzun müddət gözlədiyi sevimli aktyorlar şəhərə xüsusi bəzənmiş avtobusda gəliblər. Bu da tamaşaçılar tərəfindən çox böyük marağa səbəb olub. Tədbirə qatılan tamaşaçıların sayı gözlədiyindən də artıq olduğuna görə, filmin ulduzlar ilə nümayişi üçün daha bir zal ayrılıb.

Filmin İmza günlərini “CinemaPlus” şəbəkəsinə daxil bütün kinoteatrlarda təşkil etmək planlaşdırılır.

“M Group Production”ın yeni layihəsi “Bayram axşamı” tammetrajlı bədii filmi həm şirkətin ilk kinematoqrafiya işi, həm də gənc rejissorun debütü olub.

Toğrul Məmmədov təkcə rejissorluq vəzifəsini öz üzərinə götürməyib, həm də Fariz Əliyev və Cəmil Məmmədli ilə əməkdaşlıq nəticəsində filmin ssenari müəllifi kimi çıxış edib. Layihənin prodüseri, “M Group Productionun” rəhbəri və Azərbaycanın Əməkdar artisti Murad Dadaşov isə filmdə epizodik rollardan birini oynayıb.

Novruz bayramına həsr olunmuş filmdə Hollivud filmlərindən məlum olan yeni texnologiyalardan, mürəkkəb qrafika işləri və müasir kompyuter üsullarından istifadə olunub.

Film tamaşaçıların gurultulu alqışları ilə qarşılanıb. Yaradıcı kollektiv filmin komediya həvəskarlarının ürəyini fəth edəcəyi ilə bağlı xoş sözlərə və ümidlərə görə minnətdarlığını bildirib.

Filmin məzmunu: ekran əsəri Bayram adlı uğursuz oğlanın şirkət sahibinin qızına vurulmasından bəhs edir. Əsas hadisələr Novruz bayramı ərəfəsində cərəyan edir. Bayram uğursuzluğa son qoymağı qərara alır. Novruz bayramı ənənəsinə görə, bu arzunun həyata keçməsi üçün tonqalın üstündən tullanmaq lazımdır. Lakin o səhər yeni doğulmuş körpənin başı ilə əvvəlki Bayrama çevrilir.

Filmdə əsas rolları Əməkdar artist Əkbər Əlizadə və Elxan Quliyev, habelə aktyorlar - Oksana Rəsulova, İslam Mehrəliyev, Cəmil Məmmədli və Asya Abdullayeva oynayıblar. Filmdə həmçinin, Xalq artisti Firəngiz Mütəllimova, Əməkdar artist Nahidə Orucova, aparıcı Xose Bernardo, müğənni Miri Yusif və başqaları rol alıb.

Filmin icraçı prodüseri İsmayıl Bağırov, stilist və vizajist Nura Babayeva, kostyumları hazırıayan Aygün Mahmudova, qrim ustası Mehriban Nemətova, operator Rauf Qurbanəliyevdir.