Oktyabrın 5-də “Gənclik Mall” ticarət mərkəzinin 3-cü mərtəbəsində yerləşən “CinemaPlus” kinoteatrında “Əli və Nino” filminin yaradıcı kollektivinin iştirakı ilə mətbuat konfransı keçirilib.

Tədbirdə ekran əsərində baş rolda çəkilmiş aktrisa Mariya Valverde, prodüser Kris Tikye, ssenari müəllifi Kristofer Hempton, aktyorlar – Azərbaycanın Əməkdar artisti Mehriban Zəki, həmçinin Numan Akar, Pərviz Məmmədrzayev, Cümşüd Zeynalov iştirak ediblər.

Mariya Valverdenin sözlərinə görə, o, yaradıcı karyerasında ilk dəfə idi ki, Qafqaz qadını rolunu oynayırdı. Aktrisa etiraf etdi ki, bir daha Azərbaycana gəlmək imkanı əldə etməyə şad olardı. O, burada özünü burada evindəki kimi hiss etdiyini söyləyib.

Numan Akar filmdə maraqlı hadisələrin çox olduğunu və onlardan hansını fərqləndirməyə çətin çəkdiyini vurğulayıb.

Filmin ssenari müəllifi, “Academy Award” mükafatının laureatçısıKristofer Hempton bildirib ki, əsərdə təsvir olunan hadisələr çox intensivdir.

Prodüser Kris Tikyenin sözlərinə görə, film noyabrın ortalarında Los-Ancelesdə (ABŞ) təqdim olunacaq. Həmçinin filmin başqa ölkələrdə də təqdimatı planlaşdırılır.

Mətbuat konfransı zamanı Mehriban Zəki, Pərviz Məmmədrzayev və Cümşüd Zeynalov filmdə əks etdirdikləri obrazları haqqında danışdılar.

“Əli və Nino” filminin icraçı prodüseri Heydər Əliyev Fondunun vitse-prezidenti Leyla Əliyeva, prodüseri Kris Tikye, rejissor “BAFTA”mükafatını qazanmış Asif Kapadia, ssenari müəllifi “Academy Award” mükafatı laureatı Kristofer Hemptondur.

Qurban Səidin eyni adlı romanı - dünya bestselleri əsasında ekranlaşdırılmış film XX əsrin əvvəllərində Azərbaycanın müstəqilliyi uğrunda mübarizəsi və fərqli dinlərə mənsub iki gəncin məhəbbəti haqqında danışır. Film 2015-ci ildə lentə alınıb. Çəkilişlər Bakıda – tarixi Köhnə şəhərin küçələrində və paytaxtın müxtəlif yerlərində, həmçinin Qobustan, Xınalıq və başqa yerlərdə aparılıb.