Oktyabrın 4-də paytaxın mərkəzində, “Gənclik Mall” ticarət mərkəzinin 3-cü mərtəbəsində yerləşən, “Dolby Atmos” texnologiyası ilə təchiz olunmuş ölkənin ən böyük kinoteatrı “CinemaPlus”un açılışı keçirilib.

Gecənin qonaqları sahibkar, iri şirkət rəhbəri, aktyor, ifaçı, rejissor, prodüser, bloqqer, bomond, televiziya aparıcıları, KİV nümayəndələri olublar.

Açılışda “CinemaPlus” kinoteatrlar şəbəkəsinin baş direktoru Zaur Darabzadə qeyd edib ki, Azərbaycanda ilk dəfə “CinemaPlus” kinoteatrında “Dolby Atmos” texnologiyası təqdim olunub.

“Dolby Digital Atmos” sayəsində səs tamaşaçıya bütün istiqamətlərdən çatır. Səs müşayiətini kinoteatrın istənilən yerinə yerləşdirmək və yerini dəyişmək imkanı hesabına “Dolby Digital Atmos” film yaradıcılarına kinoda səsi yeni bir mərhələyə çıxarmaq imkan yaradır. Nəticədə tamaşaçı ekranda baş verənləri sadəcə izləmir, hadisənin mərkəzinə daxil olur.

“Dolby Digital Atmos” texnologiyası ilk dəfə 2012-ci ilin aprel ayında təqdim olunub və bütün Hollivud studiyaları tərəfindən istifadə olunur. Bu texnologiya ilə “Oskar” mükafatına layiq görülmüş 11 rejissor və 23 səs rejissoru işləyir. Bu günə kimi, bütün dünya üzrə 300-dən artıq kinoteatr bu texnologiyaya keçib. Tezliklə dünyanın bütün iri kinoteatrları “Dolby Digital Atmos” texnologiyasından istifadə edəcəyi gözlənilir.

Qeyd edək ki, kinoteatrın layihə rəhbəri isə Fəxrim Quluzadədir.

“CinemaPlus” kinoteatrlar şəbəkəsinin baş direktor müavini Cəfər Axundzadə və repertuar planlaşdırılması üzrə direktoru Faiq Kazımovqeyd etdilər ki, “Dolby Atmos” kinoteatrlar üçün həcmli səs sahəsində bir inqilabdır.

Tədbirdə diqqətçəkən məqamlardan biri dekorasiya idi. Foyedə “Dərinsulu horizont” filmi ruhunda bəzədilmiş, su və alovu imitasiya edən neft buruğu, çəllək və uzun xalça quraşdırılmışdı. Bu 2010-cu ildə Meksika körfəzində “Dipuoter-Horayzon” neft platformasında baş vermiş real hadisələr əsasında çəkilmiş, rejissor Piter Berqin ABŞ istehsalı fəlakət-filmidir.

Tədbirin sponsorları “Cinema Distribution”, “ Amapola Exclusive Events” və “TNT” idi.