Mini futbol üzrə həvəskarlar liqası MFL artıq kulminasiyaya yaxınlaşır. Yaxın günlərdə çempionatın ən yaxşı komandası bəlli olacaq.

Pley-off mərhələsinə yüksələnlər arasında “CinemaPlus” komandası da ola bilərdi, bunun üçün komandaya cəmisi 3 xal çatmadı. Lakin buna baxmayaraq, komanda nəticələrdən məyus olmayaraq yeni mövsümə hazırlaşır.

MFLstars layihəsi çərçivəsində “CinemaPlus” komandası ilə görüşərək ötən mövsümlə bağlı müzakirələr aparıb, eləcə də yeni planlardan danışıblar.

Göründüyü kimi, komanda əsas sponsor – “CinemaPlus” kinoteatrlar şəbəkəsinin şərəfinə adlandırılıb. “CinemaPlus”-un baş direktoru Zaur Darabzadə qeyd edir ki, onlar gələcəkdə də komandanı fəal şəkildə dəstəkləyəcəklər.

“MFL turniri haqda eşitmişdim. Elə yaxın günlərdə dostum Şaiq Qəribzadə də bununla bağlı mənə müraciət etdi. O, dedi ki, komadası turnirdə iştirak etməyə hazırlaşır. Və onları dəstəkləməyi təklif edir. Əlbəttə ki, təxmini büdcə ilə tanış olandan sonra razılaşdım. Belə ki, anlayırdım ki, turnir inkişaf edəcək və bu da bizimçün yaxşı reklam olacaq.

İlk olaraq bu, komandadan böyük nailiyyətlər gözləmədən sadəcə dəstək idi. Lakin uşaqlar qələbə qazanmağa başladıqca bizlərdə də necə deyərlər, iştaha yarandı (gülür). Hətta maliyyələşməni artıraraq məşqçi də cəlb etdik. Uşaqlar sübut etdilər ki, onların böyük potensialları var. Bunun bariz nümunəsi komandanın 16 qələbəsi oldu”.

Z.Darabzadə sözlərinə əlavə etdi ki, komada ən minimum tapşırığı yerinə yetirərək onluğa daxil oldu:

“Növbəti çempionata gəlincə, komandanı daha çox dəstəkləmək niyyətindəyik. Buna görə də uşaqlardan üçlüyü düşməyi gözləyirik”.

Komandanın kapitanı və təsisçisi Şaiq Qəribzadə deyir ki, komandaya ilk vaxtlar TNT Azerbaijan şirkəti də çox köməklik göstərib:

“Bütün təşkilati məsələlər mənim və Cahidin boynunda idi. Lakin biz anlayırdıq ki, biz bu cür çox bacarmayacağıq. İlk əvvəllər bizə TNT Azerbaijan şirkəti köməklik göstərdi. Daha sonra isə dostum Zaur Darabzadəyə müraciət etdim. Bundan sonra da “Cinema Plus” komandanın sponsoru oldu.

Məlum məsələdir ki, ilk vaxtlar onlar bizi dostluq münasibətlərinə görə dəstəkləyirdilər. Lakin MFL günbəgün məşhurlaşır. Növbəti çempionatda daha parlaq nəticələr əldə edəcəyik. MFL futbol ətrafında çox maraqlı oyun təşkil edib. Bu da həmçinin sponsorlar üçün də olduqca maraqlıdır”.

“Komanda uzun müddət bir yerdə oynayan uşaqlardan təşkil edilib. Biz də 6-7 nəfərdən ibarət öz komandamızı təşkil etmək qərarına gəldik. Daha sonra isə əlavə oyunçular axtarmağa başladıq. Cahidlə ikinci futzal liqasının oyunlarına gedərək, oyunçular axtarırdıq. Burada iki oyunçu diqqətimizi çəkdi – İlyas və Ceyhun. Beləcə komada ərsəyə gəldi”.

Lakin hər şey rahat olmadı. Uzun müddət komandanın işlərində çətinliklər oldu.

“İlkin oyunu bu cür tərkiblə oynayaraq 17-ci yerdə qərarlaşdıq. İkinci oyunda “CinemaPlus”-un köməkliyi ilə qüvvəmizi toplaya bildik. Komadaya daha 3 oyunçu götürdük, eləcə də məşqçimiz də oldu. Anladıq ki, ya özümüz üçün oynayaraq uduzmalı, ya da qarşımıza aydın məqsədlər qoymalıyıq. Komadaya yeni oyunçular lazım idi. Bundan əlavə, məyusedici məğlubiyyətlər də oldu ki, bu da dəyişikliklərə səbəb oldu”, - deyə Ş.Qəribzadə qeyd edir.

Komadanın aparıcı şəxslərindən olan Cahid Əsgərov qeyd edir ki, komandada hər kəs bir-birini tanıyır, burada yad yoxdur. Oyunçuları dostluq və qohumluq əlaqələri birləşdirir.

“Biz bir məqsəd ətrafında birləşmişik”.

“MFL-də elə komandalar var ki, oyunçulara əməkhaqqı verərək, mükafatlandırır. Bizdə belə şey yoxdur. Sadəcə olaraq “CinemaPlus” konoya bilet verməklə bizləri həvəsləndirir (gülür)”, - Ş.Qəribzadə sözlərinə davam edir.

Komandanın kapitanı olaraq bir çox oyunlarda onları meydana apararaq kənardan izləyirdim. Cahid meydançada bir neçə dəqiqəliyinə daxil olur, lakin həmişə köməklik göstərməyə can atır. Bir dəfə də olsun komandanı oyuna toplamaqda çətinlik çəkməmişik. Bu isə digər komandalarda dəfələrlə baş verib. Biz bir-birimizə hörmətlə yanaşırıq. Komadadakı bütün uşaqlar məsuliyyətlidirlər. Bütün yarışlarda son anadək mübarizə aparmışıq”.

Burada söhbətə Cahid qoşulur və qeyd edir ki, iki dəfə eyni komandaya məğlub olublar.

MFL haqda danışan Şaiq Qəribzadə qeyd edib ki, liqa çox maraqlı oyun təşkil edib:

“Bizlərə futbol meydançaları, çempionat lazım idi. Bu vaxta qədər bizi heç kəs kameraya çəkməmişdi, il ərzində nəticələrimizi izləməmişdi. Turnir hər kəsi diqqətlə nəzərində saxlayır”.

“Qeyd etmək istərdim ki, elə oyunlar olub ki, çoxlu sayda tamaşaçı toplaşıb. Liqa həvəskar olsa da, azarkeşlər tərəfindən böyük maraqla qarşılanır”, - deyə Cahid sözlərinə əlavə edir.

"CinemaPlus" komadasının MFL üçün təklifləri də var.

“İlk olaraq “saxtakarlıqlarla” bağlı söhbəti bağlamaq lazımdır. Komandalar ərizə verərkən yoxlanılır. Əgər hansısa komanda təsdiq olunubsa, 10-20 oyundan sonra burada “saxtakarlıq” aşakarlana bilməz. Bu məqama ilk vaxtdan nəzər yetirmək lazımdır.

Həmçinin komadaya 3-4 il əvvəl yüksək səviyyədə oynamış peşəkarları da cəlb etmək olmaz. Bundan əlavə, azarkeşlər üçün kiçik tirbunalar təşkil edilsə yaxşı olar. Həmçinin sponsorları daha fəal olmağa, MFL-ə qoşulmağa səsləyirəm”, - Ş.Qəribzadə bildirir.

Komadanın ən yaxşı bombardiri Ceyhun Şirinlidir. Komandanın kapitanı əmindir ki, Ceyhun çempionatın ən yaxşı oyunçusudur. Hücumçu öz uğurlarından bəhs etməyi sevmir, sadəcə olaraq futbol meydançasındakı işlərdən danışmağa üstünlük verir. Hətta komanda uğursuz çıxış edəndə belə Ceyhun ən yaxşı bombardirlərdən idi.

“Mən daha çox məhəllə futbolunda oynamışam. Əlbəttə ki, MFL-də oynamaq daha çətindir. Burada hər kəs qələbə qazanmaq üçün oynayır. Hər kəs çempion olmağa can atır. Buna görə də bəzən çox sərt oynayırlar. Əvvələr məni heç kim tanımırdı. Lakin sonralar daha çox nəzər yetirməyə başladılar. Komadamız çox mehriban və möhkəmdir. Bir yerdə vaxt keçirməyi sevirik. Başqa komandalarda oynamaq təklifi alsam da, lakin orada komadamızda olan ab-hava yoxdu”, - deyə Ceyhun Şirinli sözlərinə əlavə edir.

Şaiq Qəribzadə qeyd edir ki, komanda gələcəkdə də oynamağı planlaşdırır:

“Təbii olaraq kimlərsə komadanı tərk edir. Belə ki, hər kəs oyunlara vaxt sərf edə bilmir. İkincisi isə yeni mövsüm üçün yeni məqsədlərimiz var. Aydın bilirik ki, komadada nə çatışmır. Uşaqlar üçün bütüm lazımi şərait yaradılacaq ki, onlar yaxşı oyun nümayiş etdirsinlər. Lakin bizim bir qaydamız var - əməkhaqqı ödəmirik. Bu, prinsipial məqamdır. İstəmirik ki, kimsə komanda da pul xatirinə oynasın.

İlk çempionatda iştirak etməyimiz bizə möhtəşəm təcrübə bəxş edib. İndi isə daha peşəkar yanaşmaya çalışacağıq. MFL-in növbəti mövsümündə çempionluğa yüksəlmək istəyirik”.