Premium kinoteatr “CinemaPlus” 28 Mall ilk dəfə olaraq Azərbaycanda dünya premyerasından 3 gün əvvəl, ən çox gözlənilən “Yalan illüziyası 2” filminin qapalı premyera öncəsi nümayişini keçirdi.

Foye filmin üslubunda bəzədilib: hər yerdə kartlar, pullar, sirli sandıqlar və seyflər var idi. Filmdən öncə qonaqları sürpriz gözləyirdi – dəvət olunmuş sehirbaz öz bacarıqlarından bir neçəsini nümayiş etdirdi. Həmçinin hədiyyəli müsabiqələr keçirildi.Həmin gecənin qonaqları şou- biznes ulduzları, məşhur jurnalistlər, bloqqerlər və iri təşkilatların sahibləri oldular.

Filmin nümayişindən öncə “CinemaPlus” kinoteatrlar şəbəkəsinin baş direktoru Zaur Darabzadə tədbir iştirakçılarını “CinemaPlus”un fəaliyyətinin genişləndirilməsinin əsas istiqamətləri haqqında məlumat verdi.

Onun sözlərinə görə, ilin sonunda “Azərbaycan” kinoteatrının yerində və “Ganjlik Mall” ticarət mərkəzində kinoteatrın yeni şəbəkələri açılacaq. Bu yay isə kino həvəskarları şəhər ətrafında yerləşən “Amburan Mall”da üç zaldan ibarət kinoteatra da gələ biləcəklər.

“Cinema Distribution” şirkətinin baş direktoru Faiq Kazımov qeyd etdi ki, şirkət hər zaman azərbaycanlı tamaşaçıları dünya kino tarixində ən yaxşı premyeralar ilə sevindirəcək və xoş sürprizlər edəcək. Bildirildi ki, həmçinin, ən çox gözlənilən filmlərin premyera öncəsi nümayişlərin keçirilməsi təcrübəsi də davam etdiriləcək.

Nümayişin sponsorları Su İdman Sarayı, “Gazelli Group” kosmetika istehsalçısı, “Nomination” İtaliya brendi, Alman mebel və aksessuar brendi olan “KARE Design” və AVTO FM radiosu idi.

Film rəsmi olaraq “Cinema Distribution” şirkəti tərəfindən təqdim edilib.