23 sentyabr Beynəlxalq İşarə Dilləri Günü kimi qeyd olunur. Bu gün işarət dillərinin əhəmiyyətinə və eşitmə məhdudiyyəti olan insanların məlumatlara çıxış imkanlarının təmin edilməsinə diqqət cəlb etmək məqsədi daşıyır.

Gənclik Mall-da yerləşən CineMastercard kinoteatrında inklüzivlik və əlilliyi olan və olmayan insanların birgə fəaliyyətinə həsr olunmuş “Bütün bədənlər danışır” sənədli filminin nümayişi keçirilib.

Layihənin təşkilatçısı DanceAbility Azerbaijan təşkilatıdır. Film “Bütün bədənlər danışır” layihəsinin 2024–2026-cı illərdəki fəaliyyətini, eləcə də iştirakçıların şəxsi təcrübələrini əks etdirir.

Nümayiş zamanı CineMastercard kinoteatrlar şəbəkəsinin baş direktoru Zaur Darabzadə bu kimi təşəbbüslərin inklüziv cəmiyyətin inkişafı və əlilliyi olan insanların ictimai və mədəni həyatda bərabər iştirakının təmin edilməsi baxımından əhəmiyyətini vurğulayıb.

Tədbir çərçivəsində DanceAbility Azerbaijan təşkilatının rəhbəri Nigar Sultanova və Nar-ın baş direktoru Özgür Genç də çıxış ediblər. Mobil operator Nar “Bütün bədənlər danışır” sənədli filminin Azərbaycan işarət dilinə tərcüməsinə dəstək göstərib.